កំពង់ស្ពឺ៖ តំណាងរាស្ត្រខេត្តកំពង់ស្ពឺ លោក ហ៊ុន ម៉ានី បានដឹកនាំយុទ្ធនាស្វែងរកសំលេងឆ្នោត លើទឹកដីខេត្តកំពង់ស្ពឺ នៅថ្ងៃទីដំបូងនៃយុទ្ធនាការហែលក្បួនឃោសនាគណបក្សស្វែងរកសម្លេងគាំទ្រនាព្រឹកថ្ងៃទី១ ខែកក្កដា ឆ្នាំ២០២៣។
លោក ហ៊ុន ម៉ានី បានបង្ហោះសារលើបណ្តាញសង្គមលោកថា៖ «ថ្ងៃនេះ កងទ័ពនៃជំរុំទេវតាបានចេញដំណើរក្នុងការស្វែងរកសំលេងគាំទ្រ លើសង្វៀនប្រជាធិបតេយ្យ។ ពីទឹកដីនៃខេត្តកំពង់ស្ពឺ យើងទាំងអស់គ្នា ក្នុងទឹកមុខស្វាហាប់ ប្រកបដោយស្មារតីហានក្លា បានត្រៀមខ្លួនរួចជាស្រេចក្នុងការចុះទៅជួបជាមួយប្រជាពលរដ្ឋម្ចាស់ឆ្នោត ដើម្បីផ្សព្វផ្សាយ និងណែនាំនូវកម្មវិធីនយោបាយរបស់គណបក្ស»។
លោកបានឱ្យដឹងថា សំលេងហ៊ោកញ្ជ្រៀវដ៏កងរំពងបានបន្លឺឡើង ជាមួយនឹងទង់គណបក្សប្រជាជនកម្ពុជាបានបញ្ជាក់ពីការប្តេជ្ញាចិត្តរបស់សមាជិកបក្សក្នុងការធានាជ័យជម្នះជូនគណបក្សឱ្យខាងតែបាន។
តំណាងរាស្រ្តរូបនេះបានស្នើដល់ សមាជិក សមាជិកាទាំងអស់ឱ្យបំពេញបេសកកម្មជូនគណបក្សប្រកបដោយការទទួលខុសត្រូវខ្ពស់ ដោយប្រកាន់ខ្ជាប់នូវគោលការណ៍នីតិរដ្ឋ និងគោរពយ៉ាងម៉ឺងម៉ាត់នូវច្បាប់ និងបទដ្ឋានគតិយុត្តនានារបស់គណៈកម្មាធិការជាតិរៀបចំការបោះឆ្នោតសំដៅធានាឱ្យបានការប្រព្រឹត្តទៅនៃការរៀបចំការបោះឆ្នោតមួយ សេរី ត្រឹមត្រូវ និងយុត្តិធម៌។
លោក ហ៊ុន ម៉ានី គូសបញ្ជាក់ថា៖ «បោះឆ្នោតជូនគណបក្សប្រជាជនកម្ពុជា គឺបោះឆ្នោតឱ្យខ្លួនឯង»៕
